“Spuni-nj, bre gione, ocljiul di-amurã,
Tsi eshtsã tini? Unu Armãnashu?
Budzãli-aroshi, mushata-ts gurã
Mi-alashi nã oarã dultsi s-li bash?
Cã tsi amu, nu shtiu; di cãndu tini
Ti vidzuiu prota,-arãu lãndzidzãscu,
Shtii cã shi somnul fudzi di mini?
Ca tseara, gione, ah! mi tuchescu.
Macar tsi lucru-l ljau mini-n mãnã,
Pari cã u poartã, ah! ‘namea-a ta,
Lãcãrnj-atumtsea, ca ditu fãntãnã,
Ãnj curã dultsi pristi fatsa-a mea.
Yina, bre, gione, preaclj s-nã fatsimu,
Unu trupu, unu suflit, doilji s-avemu
Aestã banã doilji s-u treatsimu,
Scafa di moarti doilji s-nã-u bemu.
Tsi easti, gione, aestã tãtseari?
Ocljiul diunãoarã tsi lu-aplicashi?
Ah! nu-ai ti mini, nu-ai nã vreari,
Fudz, fudz, mi-alasã: mi vãtãmashi”.
– “Ascultã ghini, featã mãratã:
Shtiu shi cunoscu, ti mini ai doru;
Tsi s-fac? sclavu escu, inima-i datã:
Giuraiu pi crutsi-a altãljei amoru.
Aestã easti a mea tãtseari,
Ocljilji diunãoarã ti-atsea aplicai,
Ti-atsea trã tini nu amu altã vreari,
Ma shtii, tsi, soro? Frati sã-nj mi-ai”.