T-una luni catra seara
Anda luo soarli ta-s cheara
Muluvistea-nghios tu padza
La musatili livadza
Rasuna botsi di fluieri
Si cantitsi di muieri
Tsi pareau ca tiva steali
Ca s-fatsea na nunta mare
Cuscarii tutsi dipriuna
Cu fartatsi cu nun s-cu nuna
Baga-nveasta s-traga corlu
Ca-acasa-i nicu uborlu
Ia mutritsi cum tradzi corlu
Nu-i calca pi locu ciciorlu
S-tutsa ii canta cu hararu
Canticlu di-nveasta noau
Corlu creasti tut ma creasti
Pitu virdeatsa s-anvarteasti
Ma mutritsi inveasta tsi-ari
Canda-i vini na lahtari
Ah corba si-adusi aminti
Ca fu isusita ninti
Cu un gioni-mseata ca soari
Ts-si lu-avea laia tu vreari
Tu-atea oara incalari
Ini-un om pi calea mari
Ia-l s-aproachi s-ma mutreasti
S-var di cuscri nu-l cunoasti
Buna seara voi nuntari
S-va harsitsi cu nicu s-cu mari
Preaclea s-va anchirdiseasca
Bana lunga s-auseasca
Di fumei ii casa-mplina
Ma lasatsi inveasta s-ina
Ca ni-u am cusurina veara
S-voi si-i dzacu indoau zboari
Inveasta s-toarna aspareata
Mi cunostsi tini feata
Ai indreptu s-mi mutresti
S-ni cu ochlii s-mi-afirestsa
Noau ani suntu lea marata
Islu ni-u-l vidzui lea feata
Canda-aveam na piturnichi
S-ni-azbuira di pi dzanucli
Ia-ti Muse nelu di-asimi
Ca nu-ni mi astiptasi pi mini
Tini Iorghe Musa fati
Di-una oara ansari-in bratsa
Ma grambolu candu veadi
Arma-scoati ma nu sadi
Tradzi-ndreptu s-lu-agudeasti
Cadi Iorghi s-asi greasti
Sa-ni tsa cada gione mana
S-tsa baneadza ateea armana
Ma marata Musi nica
Palnili-si da si-s disica
Ah blastem,blastem pi tini
Nu ti-aproachi ninga mini
Luats-lu aestu-afurisitu
Cu mortul va-ni mi marit
Clo muri si-mseata armana
Si-aclo s-adra s-na fantana
Jalea armanamiei
La fantana vreariei.