Searâ mâipsitâ, isuseari mari
S-fatsi-aradâ ‘msheatâ tu-a noastâ-armânami
Iani s-isuseashti cu Cristina-‘msheatâ
Câlisirâ soia, shi-aspunâ a lor njiatâ
Nunjii gioacâ-arada, preachea s-tinjiseascâ
Câ-su dit soia-al Trantu, soi armâneascâ
Ei va s-ancurunâ nâ preachi ti hari
Sh-daima va lâ poarta pârinteascâ vreari
Soacra Mihaela, gioacâ cu harauâ
Tradzi caplu-arada di înveasta noauâ
Lâ ureadzâ s-aibâ mashi tihi tu banâ
Cu zboarâ aleapti dit inimâ di manâ
Gioacâ paplu Gioga, sh-maia-al Iani bunâ
Cu mari harauâ, câ-s mileti-armânâ
Au mari miraki sh-lu-au multu tu vreari
Îlu criscurâ Iani shi-lu vidzurâ mari
Socrii njits mutrescu pi-ahâtâ mushuteatsâ
La a lor Cristina cu-arâsu imsheatu pi fatsâ
Ochii-anghilicescu caldâ a-lor mutritâ
Îshi vidzurâ feata, azâ isusitâ
Ti Iani sh-Cristina, soia lâ ureadzâ
S-aibâ mari vreari, multsâ anji s-bâneadzâ
Sh-la tuti arādzli cu ayapi multâ
Tommi Caramitru sh-Gramustea s-lâ cântâ
So Lupci 09.10.2020