Papanjiljii-a melji tu muntsã mashi bãnarã,
Fudzea di iarnã, soarili mashi cãfta
Ashitsi-adrarã hoarã dupu hoarã
Sh-tu cathi casã soarli-lu dãnãsea.
Tra s-vearsã sãndzã vãrnãoar’ nu vrurã
Ti malãmã, ti locuri sh-ti aveari
Di multi ori ni casã nu shi-avurã
Tra s-aflã iarba bunã ti pãshteari.
Aräuri māri di lapti elj virsa
Ditu stanurili di tseru aspindzurati
S-nu kearã limba sh-fara anyisa
Shi-analtulu munti lã eara crivati.
Tufekea tutu sumu capu – cathi ficioru
Ma varnãoarã polimu nu shi-avurã …
Hãrnirã amirãrilji cu cashlu-a loru
Sh-cu lãna oiloru lumea u-nviscurã.
Pritu yisi-nj trecu papanjiljii-a melji pi-ayalea,
Carvanji, cãrvanji, -andreptsã ca la numtã,
Ma cãndu l-avdu cantitsli di jeali
Ca penuri tu inimã-nji si plãmtã!