Fãrtats, Fãrtãtoanji
Ma-nj bãgaiu lea dado lea,
Gionji-msheats, feati ti-anami
Easti numta mea.
Nunlu hlambura u gioacã
Corlu trei dipli s-adrã
Lãngã mini sh-lãngã vruta
Nuna s-acatsã.
Haidi sh-tini dadã
Ia tu mãnã hlambura.
Lãngã tini ialu sh-pi fendi
Easti numta mea.
Armãnamea ta s-nã veadã,
Tãbãbii s-adunã.
Cu harauã elji nã oarã
S-avemu nãfãcã.
Hai gionji, hai feate,
Mari mirachi s-nj-adrats.
Tu-msheatlu coru armãnescu
Di numtã giucats.
Giucats ti a mea mirachi,
Cã vrutã-msheatã ã-nj loaiu.
Tihi-nj deadi Dumnidzãlu,
Cu ea mi-ansuraiu.