Una luni catra seara
Anda ia soarli ta s-cheara
Muluvishte-nghios tu padz
La musheatili livadz.
Rasuna bots di mullieri
Shi cantitsi dit fluieri
Tsi s-parea ca tiva steali
‘Clo sa ftsea na numta mari.
Cuscarlli tuts dipriuna
Cu fartats, cu nun sh-cu nuna
Baga ‘nveasta s-traga corlu
Nu-i ancapi-i ñic uborlu.
Cum s-nu yina lumea s-veada
‘Nveasta noaua corlu s-traga
Ñicu sh-mari s-adunara
Sa-i harseasca shi s-la oara.
Corlu creashti tut ma creashti
Pit valoaga s-anvarteashti
Ma mutrits ‘nveasta tsi-ari
Canda-i yini na lahtari.
Ma sh-adusi corba aminti
Ca fu isusita ninti
Pi un gioni-msheat ca soari
Tsi sh-lu-avea laia tu vreari.
Tu-atsea oara ‘ncalari
Yini om di calea mari
El s-aproachi, sta , mutreashti
Can di cuscri nu-l canoasti.
-Bun va-i dzua voi numtari
Sa-ñi banats cu ñic cu mari
Preaclea s-va-anchirdiseasca
Bana lunga s-ausheasca !
Grits a ‘nveastallei ta s-yina
Ca u-am prota cusurina
Ca u-am cusurina veara
Voi sa-i dzac io doaua zboara.
‘Nveasta s-toarna aspareata
-Mi canoshtsa tini feata?
Ai andreptu s-mi agarsheshtsa
Sh-ni tu ocli s-mi mutreshtsa.
Noaua añi sun’ lea marata
Yislu ñi-l chirui io feata
Ca ñi-aveam na piturnichi
Sh-ñi azbuira dit dzanuchi !
Ia-ts Mushe nelu di-asimi
Ca nu mi ashtiptashi pi mini
-Tini Yoryi, Musha fatsi
Sh-diunaoara-i cadi ‘nbratsa.
Ma grambolu candu veadi
Scoati arma el nu sheadi
Tradzi ndreptu lu agudeashti
Cadi Yoryi sh-ashi greashti :
-Sa-ñi tsa creasca gione mana
Sh-tsa baneadza atseia-armana
Ma marata Mushi ñica
Palnili sh-da shi-s disica.
-Ah, blastem, blastem pi tini
S-nu ti aprochi ninga mini
Luats-lu aestu afurisit
Cu mortul va mi marit.
Clo sh-muri shi-msheata armana
Sh-ma si featsi na fantana
Jealea Armanamiellei
La Fantana Vrearielli.