Armâname, oaminji vruts`,
Io vâ voi armânji pi tuts, bre voi armânji !
Di`unâ etâ him armânji,
Di pâpânhi shi stripâpânhi, bre voi armânji !
`Msheati hoari avurâ armânjii,
Ma li`asparsirâ pâgânhii, voi armânji…
Msheatâ hoarâ`i Gramustea
U`asparsi Ali Pasha, bre voi armânji…
Moskopolea, hoarâ avdzâtâ,
Tora iasti sh`ea chirutâ, voi armânji…
Câ`msheata hoarâ s`asparsi
Ni chiatrâ di ea nu`armasi, voi armânji…
Doamne, câ tse blâstimashi,
Hoarili padi li-adrashi, bre voi armânji…
Câ armânjii tsi ts`au faptâ…
Di ahâti ei au traptâ, voi armânji !