Ascultats-mi fciori sh-feati
‘Ndoaua zboara voi s-v-aspun
S-nu v-ampartsats di isnafi
S-vrets tuts s-him di-adun.
Grailu-a nostu vrem s-nu chiara
Varnaoara, iutsido
Ca-aestu iasti di daima
Caimolu armanilor.
Pit hoari, pit casabadz
Tu itsi locuri va s-hits
PARINTEASCA DAMANDARI
Voi s-nu u-agarshits.
Livadzli, Saruna, Searlu
Baneadza nica tu voi
Nu va s-agarshim varoara
Plaiurli cu oi.
Voi, armañilli di pit hoari
Di-aclo voi cara s-fudzits
‘Msheati cantitsli armaneshtsa
Voi s-nu li-agarshits.
Feati-armani s-tsanets minti
Cu-armañi gioñi di v-adunats
Armaneashti s-i-azburats. Voi
S-nu v-arushunats.
Ca-ñi mi-arupshu di-a mea hoara
Nu-astipsescu cu tsiva
Di la mini zbor nu-a s-cheara
Zbor di limba mea.