Aestu cânticu easti tinjiia Gramusti’ljei ti lali Gica Godi shi ti Dinka Gospodin, oaminji cari nâ deadirâ, nica unâ oarâ, unâ flurii di culturâ armâneascâ!
Munti analtu, munti greu
Zboarâ: Gica Godi, iho: Dinka Gospodin
1.
Nividzutu di canâ oarâ
Mashi tu cărtsâ zugrâpsitu
Tu cânticu-andâmâsitu
Mashi cu mintea minduitu.
Nu-amu vidzutâ cum azvoami
Izvurlu ditu pishtireauâ
Nu-ts vidzui chinjilii pirifanji
Ni lilici tu arauâ
Nu-ts vidzui chinjilii pirifanji
Ni lilici tu arauâ
R1:
Tasi caftsâ tu yislu-a meu
Munti-analtu, munti greu?
Cum di inji tu yislu-a meu
Munti-analtu, munti greu.
Vahi câ nu putu ta-s toarnâ
Iu vrea paplu somnulu-shi doarmâ,
Ti-atsea inji tu yislu-a meu
Munti-analtu, munti greu.
Ti-atsea inji tu yislu-a meu
Munti-analtu, munti greu.
2.
Nu-ts vidzui cârvănji surii
Tsi batu calea Vinitsii
Misihori iu-a-ta dunjeauâ
Gioacâ corlu ti harauâ
Nu-am vidzutâ pitu curii
Vluisitili cupii
Plaiurli tsâ kindisescu
Shi-cu a loru lânâ Polea-‘nvescu.
Plaiurli tsâ kindisescu
Shi-cu a loru lânâ Polea-‘nvescu.
R2:
Tasi caftsâ tu yislu-a meu
Munti-analtu, munti greu?
Cum di inji tu yislu-a meu
Munti-analtu, munti greu.
Pi ciurdakea ta cu soari
Nu-am vidzutâ shi-nji mi doari
Asprânditi pitu vàlodz
Hori cu casi ca pâlăts.
Ti-atsea inji tu yislu-a meu
Munti-analtu, munti greu.