Munte, frate, munte sedz cu sãnãtati
Izvurli tsã plãngu vimtul ma-nj ti bati
Turmili-nj ti-alasã, cuclu nu-nj tsã cãntã
Munte, frate, munte inima nj-u frãmtã.
Inima nj-u frãmtã cãnd mutresc la tini
Iu tsã sunt’ pãdurli di birblj amplini
Avdzã, frate, munte bradzlji cum vãzescu
Mushuteasta adzã canda ts-u jilescu.
Mushuteatsa sãmtã shi alba primuvearã
Cãnd’ pit văiuri s-avdi cãntic dit fluiarã
Di dishteaptã noaptea bacilji la cãsheari
Sh-furlji dit limeri anda lun-ansari.
Munte, frate, munte-ts cãdzu frãndza toatã
Shi doilji oclji tu lăcrãnj greali, greali-anoatã
Puilji a tăi jilescu gionj tsi fug tu xeani
Gionj tsi alasã dinãpoi zuyrãpsiti dzeani.
Zuyrãpsiti dzeani s-fats ca di nãvai
Sh-oclji lăi tsi plãng’ cu lăcrãnj di sivdai
Lăcrãnj tsi tuchescu mushutets di dzani
Cum sunt, munte, frate, featili armãni.
Munte, vrute, munte sedz cu sãnãtati
Inima-nj ti plãndzi, jealea-nj ti stribati
Cãnd ni-aduc aminti ca va-nj mor diparti
Munte, frate, munte bana ari shi moarti.