Tu’nã luni cãtrã searã
Cãndu da soarli ca’s kiarã
Mulovisti dighiosu tu pãdzã
La musheatili livãdzã
Clo s’fãtsea nã numtã mari
Numtã mari mult cu hari
Numtã mari armãneascã
Armãneascã, arhundeascã
Ma cum s’nu s’ducã lumea s’veadã
Cã s’mãritã unã featã
Njcu’sh mari s’adunarã
Vãrã aushu nu’armasi’n hoarã
Tradzi nveasta, tradzi corlu
Nu’i calcã pi loc ciciorlu
Sh’tutsã ii cãntã cu harauã
Cãnticlu di nveastã nauã
Corlu creashti tutu ma creashti
Pitu virdeatsã s’anvãrteashti
Ia mutritsã nveasta tsi’ari
Canda ii vini nã lãhtari
Tu atsea oarã ancãlari
Yini unu omu pi calea mari
El s’aproaki sta mutreashti
Vãr ditu cuscri nu’l cunoashti
Bunã seara voi numtari
S’vã hãrsitsã cu njcu cu mari
Preachea s’vã anchirdiseascã
Sh’banã lungã s’ausheascã
Vretsã sã’i gritsã nveasta s’yinã
Cã nj’u’am protã cusurinã
Câ nj’u’am cusurinã vearã
Voi sa’i dzãcu indauã zboarã
Nveasta s’toarnã aspãreatã
Mi cunoshtsã tini featã
N’ai ndreptu s’mi agãrshestã
Ni tu oclji s’mi mutreshtsã
Ma cum sh’adusi corba aminti
Cã fu isusitã ninti
Cu un gioni msheatu ca soari
Tsi’sh lu’avea laia tu vreari
Iatsã Mushe nelu di asimi
Cã nu mi astiptashi pi mini
Tindi Iorghi Musha’n fatsã
Di nã oarã ii cadi in bratsã
Nu’i unu anu, nu suntu doi
Suntu noauã ani di dzãli
Noauã ani shi giumitati
Di’anda fudzishi tu xinãtati
Ma grambolu cãndu veadi
Scoati arma ma nu sheadi
El s’aproaki lu’agudeashti
Cadi Iorghi shi ashi greashti
Ah tsã cadã gione mãna
S’tsa bãneadzã a tsia armãna
Ma mãrata Mushi njcã
Pãlmi ishi da ishi disicã
Ah blãstem blãstem pi tini
Nu ti’aproaki ninga mini
Luatsã aestu giluitu
Cu mortul va’nj mi mãritu
Aclo muri msheata armãnã
Sh’aclo s’featsi nã fãntãnã
Jalea armãnamiei
La fãntãna vreariei