Tu a Birbiloclui mesu
Când’ deadi iarba s’ frândza,
Trei feati la fântânà ies
Cu mailu s’ batà pândza.
Imnatic s-avdi liundaru
Si pânâ s-agiungà ‘n vale
Le-astai un gioni picurar,
Cu-arîs li țâni’n cali:
Iu neadzits pirusanili,
Purumbili musati?”
Ma nâse apleacà dzeanili
Si fac ma lungi jghioati.
Ma njica dip nâpoi armasi
Si-u başi nâs pi fatà
Si-alanti doauli arâd di ea
Si tot ma li-dzâc sh-u anveatsà :
Nvalea-tsâ ghini fața, sor,
Ta s’nu-ni ti veadà ‘n hoarà,
Cà va s-agiundzâ arîslu-a lor,
Sh-cânticu va ts-adarâ
S’turnarà treile ‘n sus tu plaiu,
Manu tricù stamânà
Sh-ascoasirá un cântic laiu
Ti-atseà musatà Armânã.